Бишкектеги Улуттук конгресс-борбору ШКУ саммитинин негизги аянтчасы болот

1 из 8

2026-жылдын 24-августунда Кыргызстанда Улуттук конгресс-борборунун комплекси расмий түрдө ишке кирди. Бул борбор алдыда өтө турган Шанхай кызматташтык уюмуна (ШКУ) мүчө мамлекеттердин башчыларынын Кеңешинин жыйынын өткөрүүчү негизги аянтча катары пайдаланылат.

Комплекстин ички-тышкы жасалгалоо жана атайын курулуш иштерин башкы подрядчы катары кытайлык Shanghai Building Decoration Engineering Group Co., Ltd. компаниясы аткарды. Аталган ишкана имараттын фасадын каптап, ички жасалгалоосун, электр-механикалык жана климаттык системаларын, өрт коопсуздугун, лифттерин орнотуп, тышкы жолдорду салуу, жашылдандыруу жана жарыктандыруу иштерин толугу менен жүргүзгөн.

Улуттук конгресс-борбору 14,7 гектар аянтты ээлейт, ал эми имараттардын жалпы аянты болжол менен 39 миң чарчы метрди түзөт. Комплексте жыйындар жана конференциялар үчүн бир нече зал, ошондой эле кабыл алуу жана банкет залдары жайгашкан. Алсак, башкы жыйын залы 1238 адамга, банкет залы 1000 адамга, ал эми пресс-борбор 235 орунга ылайыкталган.

Комплекстин курамына ошондой эле сегиз мамлекеттик конок үйү кирет. Алар Бишкек шаарынын жана Кыргызстандын жети облусунун урматына аталып, расмий делегацияларды жана жогорку даражалуу конокторду кабыл алууга арналган.

Курулуш иштеринин негизги этабы 2025-жылдын 8-октябрында башталып, 2026-жылдын 30-июнунда аяктаган. Бардык иштер 265 күндүн ичинде бүткөрүлгөн. Долбоорду ишке ашырууда кытайлык жана кыргызстандык адистер, долбоорлоочулар жана мамлекеттик органдар тыгыз кызматташкан.

Shanghai Building Decoration Engineering Group Co., Ltd. компаниясы 1987-жылы негизделген жана Shanghai Construction Group Co., Ltd. холдингинин курамына кирет. Ишкана буга чейин «Шанхай мунарасы» (Shanghai Tower), Шанхайдагы Диснейленд жана башка ири глобалдык объектилерди куруу жана жасалгалоо долбоорлоруна катышкан.

Компания өкүлдөрүнүн айтымында, Бишкектеги долбоор Кытайдын курулуш жана жасалгалоо тармагындагы мол тажрыйбасын Борбор Азияда ийгиликтүү колдонууга мүмкүнчүлүк берди. Мындан сырткары, ишкана жергиликтүү коомдук долбоорлорго катышып, социалдык жоопкерчилик багытында да активдүү иш алып барууда.

Улуттук конгресс-борборунда ШКУ саммити жана башка ири эл аралык иш-чаралар өткөрүлөт. Комплекс Кыргызстандын эл аралык майдандагы мүмкүнчүлүктөрүн кеңейтүү менен бирге өлкөнүн дүйнөлүк коомчулук менен байланыштарын чыңдоого чоң салым кошот.