Кыргызстан менен Кытай Эл Республикасынын дипломатиялык кызматташуу алакаларынын 30 жылдык мааракесине арналган “Улуу Жибек жолу” көргөзмөсү болуп өттү. Бул иш-чара Конфуций институту менен биргеликте университеттин маданий чөйрөсүндө жаш таланттарды ачуу үчүн студенттердин чыгармачылык потенциалын өнүктүрүү максатында өткөрүлдү.
Көргөзмө К. Карасаев атындагы Бишкек мамлекеттик университетинин алдындагы Конфуций институту жана И. Раззаков атындагы Кыргыз мамлекеттик техникалык университети тарабынан уюштурулду.
Иш-чарага 15тен ашуун таланттуу студенттердин эмгектери коюлуп, көрүүчүлөр тарабынан жогорку баага татыды. Көргөзмө Кыргызстандын ажайып жайларынан баштап, Кытай маданиятынын сүртүмдөрүн дагы ичине камтыды. Бул сүрөттөрдү тартууда ар түрдүү ыкмалар колдонулуп, студенттердин кол эмгек чеберчилиги эң жогорку деңгээлде экендиги тастыкталды.
Айзада Матаева, И. Раззаков атындагы КМТУнун студенти: “Кытай жергесинде болуп көрбөсөк дагы, Кытай маанайын берүүгө аракет кылдык” (подзаголовок)
-Мен КМТУнун Технология факультетинин Кийим дизайны боюнча адистигинде 3-курста окуйм. Декоративдик искусство жана кол өнөрчүлүк сабагын ушул окуу семестринде алдык. Бул көргөзмө тууралуу айта турган болсок, ага кафедранын атынан катыштык. Мугалимдерибиз демилгеси, колдоосу менен ушул эмгектер жаратылды.
Жалпы тайпабыз менен 15 кыз катыштык. Алардын бардыгынын эмгектери көргөзмөгө коюлду. “Кыргызстан” боюнча эмгектер табигый кийизден жасалып, тартылды. Башкача айтканда, кийиздөө ыкмасы менен, ийне менен кийизди материал бетине киргизип чыгуу менен жасалды.
Ал эми батиктердин темасы “Кытай маданияты” болду. Сүрөттөрдү интернеттен издеп, тандап, көңүлүбүзгө жакын келгендерин тандап алдык. Батиктерди болсо табигый аппак жибекке эскиз түшүрүп, андан соң боек менен тартып чыктык. Кытай жергесинде болуп көрбөсөк дагы, Кытай маанайын берүүгө аракет кылдык.
Мага кытай искусствосундагы адам силуэтин берүү ыкмасы өзгөчө шыктандырат. Бул жерде жалпы бир образ берилет. Адамдын жүзү көрүнбөсө дагы силуэти аркылуу кандайдыр бир сырдуу дүйнө ачылгандай сезим калтырат.
Ошондуктан мен дагы бул көргөзмөгө катышуу үчүн “Кызыл көйнөкчөн кыз” аталышындагы панно, батик даярдадым. Кызыл түс болсо, бардыгыбызга белгилүү болгондой кытай маданиятында өзгөчө орунду ээлейт эмеспи. Ал коңшу элдин түшүнүгүндө бакытты, берилгендикти, сезимталдыкты билдирет.
Чыгармачыл адам катары, мага кытай маданиятын, искусствосун дагы жакындан таанып-үйрөнүүгө бул көргөзмө чоң түрткү болду. Алдыда дагы Улуу Жибек жолунун маданиятын чагылдырган бир катар эмгектерди жаратуу ой-тилегим бар.
Айка Токтосун кызы, И. Раззаков атындагы КМТУнун студенти: “Мага кытай философиясы өзгөчө жакын” (подзаголок)
— Панда Кызыл китепке кирген сейрек жаныбар гана эмес, достукту, сабырдуулукту жана боорукердикти чагылдырган Кытайдын улуттук символу болуп саналат эмеспи. Кытай маданиятын чагылдырууда, аны пандасыз элестетүүгө эч мүмкүн эмес. Ошондуктан бул көргөзмөгө “Пандалар” панносу дагы катышып жатат. Ал да кийиздөө ыкмасы менен жасалып чыкты. Бул панно көлөмүнө жараша да абдан көп эмгекти талап кылды.
Көргөзмөгө катышуу үчүн даярдык жалпысынан үч айлык убакытты алды. Ар бир эмгек өзүнүн уникалдуулугу менен баалуу деп ойлойм. Бул жерде бизге эч кандай чектөө болгон жок. Өзүбүз каалаган, жан дүйнөбүз менен жактырып тандап алган көрүнүштөрдү холст бетине түшүрдүк.
Мен Кытай жергесинде болуп көрбөсөм дагы, кытай дорамаларын абдан кызыгып көрөм. Бул маданият менен кандайдыр бир деңгээлде тааныштыгым бар десем болот. Мага кытай философиясы өзгөчө жакын. Ошондуктан көргөзмөгө катышуу үчүн “Инь-Янь” балыктарын тандап алдым. Жашоодо жакшылык менен жамандык, ак менен кара, күн менен түн ар дайым катарлаш жүрөт эмеспи. Бул философиянын түбү абдан терең. Жашоодо тең салмактуулук болушу керек. Бул абдан маанилүү деп эсептейм. Андыктан “Инь-Янь” символдору эскирбейт, жаңырбайт. Ал түбөлүктүү.
Ал эми иш процессинде кытай искусствосуна болгон кызыгуум ого бетер күчөдү десем жаңылышпайм. Бул багытты дагы тереңдеп үйрөнгүм келет.
